గణపతి అథర్వశీర్షం

ఓం భద్రం కర్ణేభిః శృణుయామ దేవాః
భద్రం పశ్యేమాక్షభిర్యజత్రాః
స్థిరైరంగైస్తుష్టువాంసస్తనూభిః
వ్యశేమ దేవహితం యదాయుః ॥
ఓం శాంతిః శాంతిః శాంతిః ॥

ఓం నమస్తే గణపతయే ।
త్వమేవ ప్రత్యక్షం తత్త్వమసి ।
త్వమేవ కేవలం కర్తాఽసి ।
త్వమేవ కేవలం ధర్తాఽసి ।
త్వమేవ కేవలం హర్తాఽసి ।
త్వమేవ సర్వం ఖల్విదం బ్రహ్మాసి ।
త్వం సాక్షాదాత్మాఽసి నిత్యమ్ ॥ 1 ॥

ఋతం వచ్మి । సత్యం వచ్మి ॥ 2 ॥

అవ త్వం మామ్ । అవ వక్తారమ్ । అవ శ్రోతారమ్ ।
అవ దాతారమ్ । అవ ధాతారమ్ । అవానూచానమవ శిష్యమ్ ।
అవ పశ్చాత్తాత్ । అవ పురస్తాత్ । అవోత్తరాత్తాత్ ।
అవ దక్షిణాత్తాత్ । అవ చోర్ధ్వాత్తాత్ । అవాధరాత్తాత్ ।
సర్వతో మాం పాహి పాహి సమంతాత్ ॥ 3 ॥

త్వం వాఙ్మయస్త్వం చిన్మయః ।
త్వమానందమయస్త్వం బ్రహ్మమయః ।
త్వం సచ్చిదానందాద్వితీయోఽసి ।
త్వం ప్రత్యక్షం బ్రహ్మాసి ।
త్వం జ్ఞానమయో విజ్ఞానమయోఽసి ॥ 4 ॥

సర్వం జగదిదం త్వత్తో జాయతే ।
సర్వం జగదిదం త్వత్తస్తిష్ఠతి ।
సర్వం జగదిదం త్వయి లయమేష్యతి ।
సర్వం జగదిదం త్వయి ప్రత్యేతి ।
త్వం భూమిరాపోఽనలోఽనిలో నభః ।
త్వం చత్వారి వాక్పదాని ॥ 5 ॥

త్వం గుణత్రయాతీతః । త్వం అవస్థాత్రయాతీతః ।
త్వం దేహత్రయాతీతః । త్వం కాలత్రయాతీతః ।
త్వం మూలాధారస్థితోఽసి నిత్యమ్ ।
త్వం శక్తిత్రయాత్మకః ।
త్వాం యోగినో ధ్యాయంతి నిత్యమ్ ।
త్వం బ్రహ్మా త్వం విష్ణుస్త్వం రుద్రస్త్వం ఇంద్రస్త్వం
అగ్నిస్త్వం వాయుస్త్వం సూర్యస్త్వం చంద్రమాస్త్వం
బ్రహ్మ భూర్భువఃస్వరోమ్ ॥ 6 ॥

గణాదిం పూర్వముచ్చార్య వర్ణాదిం తదనంతరమ్ ।
అనుస్వారః పరతరః । అర్ధేందులసితమ్ ।
తారేణ ఋద్ధమ్ । ఏతత్తవ మనుస్వరూపమ్ ।
గకారః పూర్వరూపమ్ । అకారో మధ్యమరూపమ్ ।
అనుస్వారశ్చాంత్యరూపమ్ । బిందురుత్తరరూపమ్ ।
నాదః సంధానమ్ । సంహితా సంధిః ।
సైషా గణేశవిద్యా । గణక ఋషిః ।
నిచృద్గాయత్రీచ్ఛందః । గణపతిర్దేవతా ।
ఓం గం గణపతయే నమః ॥ 7 ॥

ఏకదంతాయ విద్మహే వక్రతుండాయ ధీమహి ।
తన్నో దంతిః ప్రచోదయాత్ ॥ 8 ॥

ఏకదంతం చతుర్హస్తం పాశమంకుశధారిణమ్ ।
రదం చ వరదం హస్తైర్బిభ్రాణం మూషకధ్వజమ్ ।
రక్తం లంబోదరం శూర్పకర్ణకం రక్తవాససమ్ ।
రక్తగంధానులిప్తాంగం రక్తపుష్పైః సుపూజితమ్ ।
భక్తానుకంపినం దేవం జగత్కారణమచ్యుతమ్ ।
ఆవిర్భూతం చ సృష్ట్యాదౌ ప్రకృతేః పురుషాత్పరమ్ ।
ఏవం ధ్యాయతి యో నిత్యం స యోగీ యోగినాం వరః ॥ 9 ॥

నమో వ్రాతపతయే । నమో గణపతయే ।
నమః ప్రమథపతయే ।
నమస్తేఽస్తు లంబోదరాయైకదంతాయ
విఘ్ననాశినే శివసుతాయ శ్రీవరదమూర్తయే నమః ॥ 10 ॥

ఏతదథర్వశీర్షం యోఽధీతే । స బ్రహ్మభూయాయ కల్పతే ।
స సర్వవిఘ్నైర్న బాధ్యతే । స సర్వతః సుఖమేధతే ।
స పంచమహాపాపాత్ప్రముచ్యతే ।
సాయమధీయానో దివసకృతం పాపం నాశయతి ।
ప్రాతరధీయానో రాత్రికృతం పాపం నాశయతి ।
సాయం ప్రాతః ప్రయుంజానో అపాపో భవతి ।
సర్వత్రాధీయానోఽపవిఘ్నో భవతి ।
ధర్మార్థకామమోక్షం చ విందతి ॥ 11 ॥

ఇదమథర్వశీర్షమశిష్యాయ న దేయమ్ ।
యో యది మోహాద్దాస్యతి స పాపీయాన్ భవతి ।
సహస్రావర్తనాత్ యం యం కామమధీతే తం తమనేన సాధయేత్ ॥ 12 ॥

అనేన గణపతిమభిషించతి స వాగ్మీ భవతి ।
చతుర్థ్యామనశ్నన్ జపతి స విద్యావాన్ భవతి ।
ఇత్యథర్వణవాక్యమ్ ।
బ్రహ్మాద్యావరణం విద్యాత్ న బిభేతి కదాచనేతి ॥ 13 ॥

యో దూర్వాంకురైర్యజతి స వైశ్రవణోపమో భవతి ।
యో లాజైర్యజతి స యశోవాన్ భవతి । స మేధావాన్ భవతి ।
యో మోదకసహస్రేణ యజతి స వాంఛితఫలమవాప్నోతి ।
యః సాజ్యసమిద్భిర్యజతి స సర్వం లభతే స సర్వం లభతే ॥ 14 ॥

అష్టౌ బ్రాహ్మణాన్ సమ్యగ్గ్రాహయిత్వా సూర్యవర్చస్వీ భవతి ।
సూర్యగ్రహే మహానద్యాం ప్రతిమాసన్నిధౌ వా జప్త్వా సిద్ధమంత్రో భవతి ।
మహావిఘ్నాత్ప్రముచ్యతే । మహాదోషాత్ప్రముచ్యతే ।
మహాపాపాత్ప్రముచ్యతే । స సర్వవిద్భవతి స సర్వవిద్భవతి ।
య ఏవం వేద ఇత్యుపనిషత్ ॥ 15 ॥

॥ ఇతి శ్రీగణపత్యథర్వశీర్షోపనిషత్ సమాప్తా ॥