బ్రహ్మ సంహిత

ఈశ్వరః పరమః కృష్ణః సచ్చిదానంద విగ్రహః ।
అనాదిరాదిర్గోవిందః సర్వ కారణ కారణమ్ ॥ 1 ॥

చింతామణి ప్రకర సద్మసు కల్పవృక్ష
లక్షావృతేషు సురభీరభిపాలయంతమ్ ।
లక్ష్మీ సహస్ర శత సంభ్రమ సేవ్యమానం
గోవిందమాది పురుషం తమహం భజామి ॥ 29 ॥

వేణుం క్వణంతమరవింద దలాయతాక్షం
బర్హావతంసమసితాంబుద సుందరాంగమ్ ।
కందర్ప కోటి కమనీయ విశేష శోభం
గోవిందమాది పురుషం తమహం భజామి ॥ 30 ॥

ఆలోల చంద్రక లసద్వనమాల్య వంశీ
రత్నాంగదం ప్రణయ కేలి కలా విలాసమ్ ।
శ్యామం త్రిభంగ లలితం నియత ప్రకాశం
గోవిందమాది పురుషం తమహం భజామి ॥ 31 ॥

అంగాని యస్య సకలేంద్రియ వృత్తిమంతి
పశ్యంతి పాంతి కలయంతి చిరం జగంతి ।
ఆనంద చిన్మయ సదుజ్జ్వల విగ్రహస్య
గోవిందమాది పురుషం తమహం భజామి ॥ 32 ॥

అద్వైతమచ్యుతమనాదిమనంత రూపమ్
ఆద్యం పురాణ పురుషం నవ యౌవనం చ ।
వేదేషు దుర్లభమదుర్లభమాత్మ భక్తౌ
గోవిందమాది పురుషం తమహం భజామి ॥ 33 ॥

పంథాస్తు కోటి శత వత్సర సంప్రగమ్యో
వాయోరథాపి మనసో ముని పుంగవానామ్ ।
సోఽప్యస్తి యత్ప్రపద సీమ్న్యవిచింత్య తత్త్వే
గోవిందమాది పురుషం తమహం భజామి ॥ 34 ॥

ఏకోఽప్యసౌ రచయితుం జగదండ కోటిం
యచ్ఛక్తిరస్తి జగదండ చయా యదంతః ।
అండాంతరస్థ పరమాణు చయాంతరస్థం
గోవిందమాది పురుషం తమహం భజామి ॥ 35 ॥

యద్భావ భావిత ధియో మనుజాస్తథైవ
సంప్రాప్య రూప మహిమాసన యాన భూషాః ।
సూక్తైర్యమేవ నిగమ ప్రథితైః స్తువంతి
గోవిందమాది పురుషం తమహం భజామి ॥ 36 ॥

ఆనంద చిన్మయ రస ప్రతిభావితాభిస్
తాభిర్య ఏవ నిజ రూపతయా కలాభిః ।
గోలోక ఏవ నివసత్యఖిలాత్మ భూతో
గోవిందమాది పురుషం తమహం భజామి ॥ 37 ॥

ప్రేమాంజన చ్ఛురిత భక్తి విలోచనేన
సంతః సదైవ హృదయేషు విలోకయంతి ।
యం శ్యామసుందరమచింత్య గుణ స్వరూపం
గోవిందమాది పురుషం తమహం భజామి ॥ 38 ॥

రామాది మూర్తిషు కలా నియమేన తిష్ఠన్
నానావతారమకరోద్భువనేషు కింతు ।
కృష్ణః స్వయం సమభవత్పరమః పుమాన్యో
గోవిందమాది పురుషం తమహం భజామి ॥ 39 ॥

యస్య ప్రభా ప్రభవతో జగదండ కోటి
కోటిష్వశేష వసుధాది విభూతి భిన్నమ్ ।
తద్బ్రహ్మ నిష్కలమనంతమశేష భూతం
గోవిందమాది పురుషం తమహం భజామి ॥ 40 ॥

మాయా హి యస్య జగదండ శతాని సూతే
త్రైగుణ్య తద్విషయ వేద వితాయమానా ।
సత్త్వావలంబి పర సత్త్వం విశుద్ధ సత్త్వమ్
గోవిందమాది పురుషం తమహం భజామి ॥ 41 ॥

ఆనంద చిన్మయ రసాత్మతయా మనఃసు
యః ప్రాణినాం ప్రతిఫలన్స్మరతాముపేత్య ।
లీలాయితేన భువనాని జయత్యజస్రం
గోవిందమాది పురుషం తమహం భజామి ॥ 42 ॥

గోలోక నామ్ని నిజ ధామ్ని తలే చ తస్య
దేవీ మహేశ హరి ధామసు తేషు తేషు ।
తే తే ప్రభావ నిచయా విహితాశ్చ యేన
గోవిందమాది పురుషం తమహం భజామి ॥ 43 ॥

సృష్టి స్థితి ప్రలయ సాధన శక్తిరేకా
ఛాయేవ యస్య భువనాని బిభర్తి దుర్గా ।
ఇచ్ఛానురూపమపి యస్య చ చేష్టతే సా
గోవిందమాది పురుషం తమహం భజామి ॥ 44 ॥

క్షీరం యథా దధి వికార విశేష యోగాత్
సంజాయతే న హి తతః పృథగస్తి హేతోః ।
యః శంభుతామపి తథా సముపైతి కార్యాద్
గోవిందమాది పురుషం తమహం భజామి ॥ 45 ॥

దీపార్చిరేవ హి దశాంతరమభ్యుపేత్య
దీపాయతే వివృత హేతు సమాన ధర్మా ।
యస్తాదృగేవ హి చ విష్ణుతయా విభాతి
గోవిందమాది పురుషం తమహం భజామి ॥ 46 ॥

యః కారణార్ణవ జలే భజతి స్మ యోగ
నిద్రామనంత జగదండ సరోమకూపః ।
ఆధార శక్తిమవలంబ్య పరాం స్వమూర్తిం
గోవిందమాది పురుషం తమహం భజామి ॥ 47 ॥

యస్యైక నిశ్వసిత కాలమథావలంబ్య
జీవంతి లోమ విలజా జగదండ నాథాః ।
విష్ణుర్మహాన్స ఇహ యస్య కలా విశేషో
గోవిందమాది పురుషం తమహం భజామి ॥ 48 ॥

భాస్వాన్యథాశ్మ శకలేషు నిజేషు తేజః
స్వీయం కియత్ప్రకటయత్యపి తద్వదత్ర ।
బ్రహ్మా య ఏష జగదండ విధాన కర్తా
గోవిందమాది పురుషం తమహం భజామి ॥ 49 ॥

యత్పాద పల్లవ యుగం వినిధాయ కుంభ
ద్వంద్వే ప్రణామ సమయే స గణాధిరాజః ।
విఘ్నాన్విహంతుమలమస్య జగత్త్రయస్య
గోవిందమాది పురుషం తమహం భజామి ॥ 50 ॥

అగ్నిర్మహీ గగనమంబు మరుద్దిశశ్చ
కాలస్తథాత్మ మనసీతి జగత్త్రయాణి ।
యస్మాద్భవంతి విభవంతి విశంతి యం చ
గోవిందమాది పురుషం తమహం భజామి ॥ 51 ॥

యచ్చక్షురేష సవితా సకల గ్రహాణాం
రాజా సమస్త సుర మూర్తిరశేష తేజాః ।
యస్యాజ్ఞయా భ్రమతి సంభృత కాల చక్రో
గోవిందమాది పురుషం తమహం భజామి ॥ 52 ॥

ధర్మోఽథ పాప నిచయః శ్రుతయస్తపాంసి
బ్రహ్మాది కీట పతగావధయశ్చ జీవాః ।
యద్దత్త మాత్ర విభవ ప్రకట ప్రభావా
గోవిందమాది పురుషం తమహం భజామి ॥ 53 ॥

యస్త్వింద్రగోపమథవేంద్రమహో స్వకర్మ
బంధానురూప ఫల భాజనమాతనోతి ।
కర్మాణి నిర్దహతి కింతు చ భక్తి భాజాం
గోవిందమాది పురుషం తమహం భజామి ॥ 54 ॥

యం క్రోధ కామ సహజ ప్రణయాది భీతి
వాత్సల్య మోహ గురు గౌరవ సేవ్య భావైః ।
సంచింత్య తస్య సదృశీం తనుమాపురేతే
గోవిందమాది పురుషం తమహం భజామి ॥ 55 ॥

శ్రియః కాంతాః కాంతః పరమ పురుషః కల్పతరవో
ద్రుమా భూమిశ్చింతామణి గణ మయీ తోయమమృతమ్ ।
కథా గానం నాట్యం గమనమపి వంశీ ప్రియ సఖీ
చిదానందం జ్యోతిః పరమపి తదాస్వాద్యమపి చ ॥
స యత్ర క్షీరాబ్ధిః స్రవతి సురభీభ్యశ్చ సుమహాన్
నిమేషార్ధాఖ్యో వా వ్రజతి న హి యత్రాపి సమయః ।
భజే శ్వేతద్వీపం తమహమిహ గోలోకమితి యం
విదంతస్తే సంతః క్షితి విరల చారాః కతిపయే ॥ 56 ॥